Ég er núna búin að vera hér í 2 mánuði og bíð ennþá eftir internet-tengingunni. Það hefði verið lítið mál fyrir þá hjá OVodafone að segja mér að ég gæti ekki flutt gömlu internettenginguna með mér til Síberíu. Það hefði sparað mér heilmikið ómak og sparað OVodafone það að gera sig að fífli. Annars segja mér innfæddir að símalína verði að liggja ofanjarðar af því jörðin er of frosin tilað grafa í. Þeir segja líka að túndruíkornarnir komi vísast tilað naga símakapalinn í sundur af því þeim finnst gott að brýna tennurnar á plasti. Fritag, sérlegur hjálparkokkur minn hérna, ætlar að tala við íkornaöldunginn við tækifæri. Ég kynntist Fritag fyrir algera tilviljun. Fjallarottuveiðimennirnir sögðu mér af manni sem talar stórborgarrússnesku, sjálfir tala þeir bara igrúk og ég skil ekki orð af því sem þeir segja.
Allavega; ég samdi lag um reynslu mína: http://vefpostur.internet.is/~gislim/eg_vil_vera_bleikur.mp3

ALLT BRJÁLAÐ EINSOG Í GÆR OG FYRRADAG


THE DENOUNCE OF COMMUNISM
Og fram heldur áframvindan, bæði fram og áfram - einsog vindubrúin fræga á sýrukastalanum í sögunni gömlu.
Greifynjan Paulette Gismoard erfði allt eftir föður sinn eftir að hann féll af hestbaki og lamaðist fyrir neðan barka. Eftir fallið fylltist höfuðið á föður hennar af ranghugmyndum og hann hélt að hann væri guðleg vera, gæti flogið og uppfyllt óskir þegnanna í landinu. Hann var með vélmenni sem hann stýrði með blæstri í gegnum digital fíber-rör sem hann hafði í munninum og sífellt að reynað láta vélmennið útbúa handa sér skikkju svo hann gæti verið alvöru guð. Skikkjugerðin hjá vélmenninu gekk greiðlega fyrir sig en það var erfiðara að klæða kónginn í skikkjuna og endaði yfirleitt með því að vélmennið reif einhvern útlim af kónginum í tilrauninni. Faðir greifynjunnar kenndi ekki neins og tók ekki eftir því þegar hann missti útlim en varð máttlaus þegar hann missti mikið blóð.
Á endanum, eftir að hann hafði misst 2 hendur og einn fót, dó hann og það var mikil sorg í ríkinu sem núna var orðið greifynjuríki. Í líkræðunni sem æðstipresturinn hélt áðuren dóttirin, greifynjan sturtaði líki föður síns niðrí krókódílasíkið, talaði hann um kaldhæðnina í því að þótt karlinn væri með ranghugmyndir um að vera eitthvað annað en hann var, þá var ranghugmyndin í rauninni alveg rétt - karlinn var bara búinn að gleyma því hver hann var, að hann væri kóngur og ruglaðist aukþess á muninum á kóngi og guði.
en núna var stúlkan alsráðandi í ríkinu en þetta hafði tekið of langan tíma og hún var orðin sturluð af því að bíða og útaf vantraustinu sem henni var sýnt.
Meiraðsegja þótt kóngurinn væri farlama og elliær með þaðsem þá voru taldar ranghugmyndir, datt engum í hug að horfa til hennar með að taka yfir stjórn ríkisins. Hún beið frá þeim degi þegar fréttist af falli kóngsins tilbúin að taka við völdum en enginn kom og ráðgjafarnir létu einsog þeir væru að stjórna í veikindum kóngsins, en voru að sjálfsögðu að pota sínum otutota og baka eldskörunarkökur.
Greifynjan, stúlkan sem hét Paulette Gismoard var að sjálfsögðu í raunogveru prinsessa en núna drottning eftir fall kóngsins föður hennar - brást við með því að lýsa yfir almennum jöfnuði í ríkinu. Allir sem stýrðu búi en áttu það ekki, áttu núna búið og allt landið kringum það en var skylt að skila allri landbúnaðarvöru umfram neyslu, á markað í þorpinu nýjum eigendum að kostnaðarlausu. Hún fríddi allra þræla og gaf þeim gull úr gullforða ríkisins, konum í vændi og öðrum í nauðungarvinnu bauð hún að taka yfir kirkjur landsins eftir að hún hafði rekið alla kljárkana yfir í næsta ríki, Portúgastan. Kirkjunum hélt hún áfram uppi með tíund en tíundina tók hún núna af hermönnum ríkisins - en þeim sem störfuðu í kirkjunum var frjáls höndin með það undir hvaða starfa þær notuðu aðstöðuna.
Hún leysti upp kastalahirðina og brenndi öllum bókum um ættartölu, bannaði minnugum mönnum að muna skyldleika og tengsl og byrlaði hinum ættgöfugu óminnislyfi - þannig þeir mundu ekki lengur að þeir voru fyrrum blánir í blóði - allir ójafnir skyldu jafn ójafnir.
Hún lýsti bandaríska kvikmyndaleikstjórann Spike Lee verndara ríkisins og lét hefja skógrækt inná danssal kastalans.
Allir glæpamenn voru leystir úr haldi og þeim sem höfðu voru dæmdir fyrir þjófnað, var fengið í hendur það sem þeir höfðu reynt að stela. Morðingjunum var safnað saman og þeim boðin vinna á sérlegum sýruakri greifynjunnar. Grafir hengdra og brenndra norna voru lýstar heilagar og Spike Lee var sjálfur sóttur frá Ameríku til að blessa þær. Nornir sem voru ennþá lifandi og biðu aftöku fengu sérlega heiðursorðu SpikeLeeReglunnar og þeim var boðið í kastalann og starfa að því á uppfinningastofu að reynað að finna upp matvæli sem aldrei þrytu og ennfremur finna upp og hanna góð eiturlyf handa greifynjunni.

Hver er boðskapurinn með þessari sögu? Við vitum það ekki, Behringer SM57 skrifaði þessa sögu í morgun og hefur hingaðtil ekki verið fáanlegur tilað útskýra meiningu hennar. Hann segir að list eigi að skynja fremur en skilja og beit í þumal sér að okkur og kallaði okkur smáborgara og formalista.

Oddgeir Atgeirsnefsson, í fjarveru Iggjalds Gullspillssonar sem er í fríi vegna árlegs rigningadansleiks hins íslenska indjánafélags.

BOGGULL ENDURMIXAÐUR
THE GREAT TERROR Þetta lag var birt áður undir nafninu Guns on the Roof en hét í raun Guns on the Bering Sea, ég held að það hafi áður verið að reynt að útskýra afhverju þessir íslensku bogglar kjósa að nefna tónlist sína uppá ensku - en það var mjög flókið og komst kanski ekki alminnilega til skila.
Fyrst héldum við að það væri útaf fælsisteminu í tónlistarforritunum sem þeir nota þegar þeir eru að vinna mússikina, en það stóðst ekki skoðun enda alþjóðlegir lyklar og tákn komin í öll stýrikerfi núorðið.
Við fengum síðan Mælissérfræðing til starfa hjá Boggli ehf, eftir langvarandi grunsemdir um að boggullinn Behringer SM57 væri haldin málheltu og kynni ekki að mynda framgómslegs lokhljóð. Mælissérfræðingurinn, Natalya Koskakova frá St. Pétursborg, talar ekkert nema rússnesku en eftir því sem við komumst næst eru talfærin í bogglunum ennþá vön hörðum framburði einsog tíðkaðist í Evrópu fyrir 1200 árum og ráða því ekki við íslenskuna í nútímanum sem er orðin svo linmælt. Það voru gerðar tilraunir með þetta og bogglarnir fyrst látnir lesa þetta kvæði á gaml-norsku, úr kvæðaheftinu Kveldspráki Kannibals:

hryggrum byggrum
hrefenum malkum
hyggurums byggsum
favita falkum

Og síðan strax á eftir hinn íslenska kánterpart, einsog hann kemur fyrir í Kvöldræðum Kannibalusar:

þótt hrygginn byggir
hrafnsins mjólk
hyggur bygg sér
fávíst fólk

Bogglarnir skildu bæði kvæðin einsog þau stóðu á blaði, en gátu bara haft eftir kvæðið gamlnorska.
Í endursögn hljómaði kvæðið svo:

Mjólk er góð, jafnvel úr hröfnum
og góð fyrir bein
en fávíst fólk kýs heldur
að drekka bjór

Tilað sanna kenninguna svo af tæki var bogglunum ennfremur gefið það verkefni að snúa kvæðinu yfir á ensku, og fylgja merkingunni frekar en orðunum úr orginal útgáfunum.
Þeir luku við það og skiluðu af sér þessu ljóði:

For the steeple, people
milk for its ilk
A Raven´s bone, high on throne
Dearly prefers beer

Þýðing bogglanna var ólíkindalega lík þýðingu á sama ljóði frá sama tíma og í barnasöngvabókinni The Edgar Allan Poe´s Collection of Nursery Rhymes, Volume 54 frá árinu 1867 - og birtist svo - með góðfúslegu leyfi höfundar:

High up on the Steeple
A Raven gnaws on a Bone
No one should bilk Milk
Small People don´t drink Beer

Það var því til sönnunar um harðgerðni talfæra bogglanna, sem eru klónaðir úr frumuvefjum frá þeim tíma þegar miklu meira var um ljón á meginlandi Evrópu, ljón og önnur dýr sem drápu bráð sína með því að bíta hana á barkann og kyrkja. Það má samt ekki misskiljast að enska nútímans sé svo skýrmælt og hart mál einsog þessi kenning gefur til kynna - það eru bara bogglarnir sem hafa þannig framburð.

Nastya Koskakova hin rússneska og hinn tékkneski, Vyatoslav Blakjakin - sem er sérlegur uppeldisfélagsfræðingur bogguls inc, lentu síðan í harðarifrildi um raunverulega ástæðu enskugirni bogglanna þegar sá síðarnefndi, hinn tékknesi Vyatoslav Blakjakin nefndi aðra kenningu til sögunnar.
Hann vildi meina, og studdi það órekjanlegum rökum að bogglarnir tryðu á alheims tjáskipti miðil borgara heimsins, semsé eitt tungumál fyrir alla. Ef allir tala sama tungumál eykur það jöfnuð meðal manna og þarafleiðandi auðveldara fyrir fólk að eiga frjáls og óþvinguð samskipti.

En ergo, The Great Terror - UK17 mix - í boði hins nýlýðræðislegu samfélags boggla (ath. boggull 386 vill að andstaða hans sé bókuð, hann er hvorki sáttur við mixið né nokkuð annað sem kemur fram á þessari síðu)

Iggjaldur Geltspjaldsson, Sitjandi Formaður (ef einhver er að velta því fyrir sér þá já, ég er indjáni. Nafngiftin Sitjandi Formaður kemur tilaf því að á mínum yngri árum þá settist ég aldrei neins annars staðar en þarsem ég var fyrir öllum. Yfirleitt var kallað á mig "Færðu þig" en það naf)n var frátekið afa mínum, Færðu þig, sem var bæklaður alkóhólisti.

Beint framhald !!!

THE CRITERIA OF POWER
Hin samfélagslega vitundarvakning bogglanna hefur lýst sér með ýmsu móti. Sumir bogglarnir eru meðvitaðri um jafna dreifingu matvæla, enginn vill fá meira en sá næsti og allir verða áhyggjufullir og þungbrýndir ef þeir fá minna því þá vita þeir að einhver er ekki samtaka í jöfnuðinum. Við höfum áhyggjur af þessari þróun, allir bogglarnir borða minna en þeir gerðu, aukþess að sumir eru hættir að borða vissir matvörur - td. eru bogglar 3, c og lll orðnir grænmetisætur og vilja sérfæði. Boggull LC ll vill engar mjólkurafurðir og boggull 16 neitar að borða kartöflur.
Þarsem bogglarnir voru endurvaktir úr frumuvefjum úr dýrum sem dóu út 1100 árum þegar loftslagið var allt öðru vísi á Ísland, gefur það augaleið að þeir eru ekki í sínu Prima Firmus hér á Íslandi nútímans - heilsa þeirra er því viðkvæm og enn sem komið er vitum ekki hvort betra er fyrir bogglana að borða minna eða meira meðan þeir eru í þessu ástandi.
Einhver lagði til að meðalvegurinn væri skynsamlegasta lausnin á dillemmu sem slíkri, en á fundi komust rannsóknarmenn að þeirri niðurstöðu að ömmuleiðin skyldi valin - þ.e. láta dýrin borða á sig blístur í hvert skipti.
Það urðu skemmtilegar umræður um orðtækið "að borða á sig blístur" við matarborðið þegar "ömmuleiðin" var fyrst reynd. Nokkrir héldu því fram að vitlaust væri með orðtækið farið en útlendingarnir í hópnum (statistíkur-managerinn okkar er pólskur og Outlook-verkfræðingurinn er franskur), skildu ekki þegar reynt var að þýða fyrir þá svo gegnsæi orðanna skildist, af hverju nokkrum dytti í hug að hollt væri að borða svo mikið að mann tæki allan út í kýlum og blöðrum. Blístur er líka gamalt orð fyrir blöðrur og önnur útferðarsár, og útlendingarnir skildu orðkynngnina í því að lýsa ofáti á þann veg að loft blístrast útum opið kýli á líkamanum.
Lífeðlisfræðingurinn okkar, Pálína á hjólinu, tók líka undir að svona brygðist líkami manna ekki við fæðutruflunum.
Nóg um það.
Aðrir bogglar fundu einstaklingshyggju sinni útrás í sósjalismanum og töldu það húmaníska og náttúrulega yppfyllningu hinnar almáttarlegu sköpunargetu sinnar.
Þeir telja í hverjum boggli búi einhverskonar listamaður, og öll hans sköpun sé einstök og mikilvæg. Það urðu því hatrammar deilur í mixerklefanum milli þeirra tveggja boggla - 386 og UK17, sem töldu sinn innra listamann vera hljóðblandara. Þeir rifust um það hvernig mússikk bogglanna ætti að hljóma og hafa enn ekki fundið neina lendingu í þeim málum. 386 afneitar öllu grúski og hljómum sem hafa heyrst áður, hann hefur verið að lesa þeóríu um 12tónamússik og er hrifinn en finnst hún vera takmörkuð við alltof fáa hljóma og finnst líka að of mikið hafi þegar verið samið af tónlist í þessum dúr. (Af gefnu tilefni, 386 leggur hatramma fæð á bæði dúr og moll hljóma og neitar að vinna við tónlist þarsem slíkir hljómar koma fyrir).
UK17 skiptir um skoðun á tveggja mínútu fresti og hagar sér einsog þríklofinn persónuleiki á sýru í speglasal. Aðra mínútuna vill hann að mörghundruð manna symfóníur flytji tónlist bogglanna og hefur ítrekað reynt að krefja okkur um númerið á útgjaldareikningi bogguls ehf, svo hann geti pantað orkestral útsetningar frá fyrirtæki John Paul Jones í London - sem eru fokdýrar, sjáið til, við viljum allt fyrir bogglana gera - en þetta er langt yfir mörkunum.
Tveimur mínútum síðar er UK17 orðinn Becksinni og vill gera allt sjálfur með einum sampler og leitar í ruslinu að ónýtum míkrafónum tilað gera eins heimilislegar upptökur og mögulegt er.
Um daginn atvikaðist þannig að UK17 afneitaði allri mússiksögu og öllu því tengdu sem áður hefur verið prófað og gert - þá var hann fyrir íroníska tilviljun orðinn sammála 386, en það gekk ekki til lengdar - hann hafnaði hugmyndum 386 á þeirri forsendu að 386 væri asni.

Á næstu vikum verða því endurbirt nokkur eldri lög, þarsem ný mix hafa verið gerð af þeim og mixerbogglarnir tveir geta engan veginn fundið lendingu í því að ákveða hvort mixið sé betra.

Og enn meira enn síðar
Iggjaldur Gjeldspeltsson, Sitjandi Formaður

Vofa gengur ljósum logum á rannsóknarstofu Bogguls ehf.
THE FLAG OF NEO CAPITALISM Í sumarafleysingum starfaði ungur vinstrigrænn og hafði yfirumsjón með því að umhverfisleg hagkvæmni væri ávallt leiðlýsandi vegbeinir á kaffi- og fjölritunarstofu þarsem starfsmenn eyða sínum frítíma mestum.
Forstjórinn sitjandi, tortryggði sumarafleysingastarfskraftinn enda skildi hann hvorki hvað vinstrigrænninn var að gera hjá fyrirtækinu, né mundi eftir því að hafa ráðið hann.
Vinstrigrænninn reyndist enda tvæfaldur í roðinu, enda að vestan, hann var hingað/þarna kominn fyrir tilbeina hins íslenska staðgengilsfyrirtæki hins útlenska
W(ild)L(ife)W(orld)P(reservations)F(und) Samband villtslífs um veraldarverndun (athugasemd; Það þarf að reka Hallgrím Helgason úr þýðningaráði, hann er alger pest).
Agentinn vinstrigrænni hafði það verk með höndum að finna útúr með því hvort illa væri að umhverfi boggla og aðbúnaði staðið, og/eða þeir píndir eða látnir prófa stórhættulegar og kemískar fegurðarvörur.
Við hjá bogglum etc getum státað okkur stolt af því að athugun garðaðumgenginni hafði enginn, hvorki bogglar né dýrfriðusinnar, nokkurt upp á okkur að klaga. Í niðurstöðuskýrslu sem vinstrigrænninn afhenti stofunni þegar hann gekk af dulargerfi sínu og færði starfsmönnum rauninn um raunverulegt eðli síns starfa, var þess og getið að bogglarnir hafa það talsvert betra hjá okkur en dæmigerð íslensk fjölskylda í lægsta launaþrepi.
Útkoman var sú að eftir viðkynnin af vinstrigræninum voru elstu bogglarnir orðnir samfélagslega sinnaðir og búnir að taka sósjalska trú

Meira síðar
Iggjaldur Gjeldspeldsson, sitjandi

Lagið TERMINATOR 3 Allir bogglarnir eru spenntir eftir að hafa séð trailer að samnefndri mynd nema boggull nr 2, hann er hrifnari af græna skrímslinu Hulk

Guns on the roof Bogglarnir voru himinlifandi glaðir þegar þeir fréttu af fyrirheitum Fjármálaráðherra um að gera ráð fyrir hljóðfærakaupum fyrir boggul inc, í næstu fjárlögum. Bogglarnir eru hrifnir af hverskyns strengjahljóðfærum og vona að Geir Haarde útvegi þeim eintak af rómaðri 5-strengja lágfiðlu sem þeir sáu auglýsta á netinu

OG NÝTT LAG ÚR UPPTÖKUBÚRI BOGGLANNA Það heitir Boggull

Mesta framvindan hingað til

Ad Karitum Perpeptum reyndist annarsstaðar en það var séð. Vegna formlegra tengsla bogglateymisins við hið opinbera stjórnkerfi íslenska hafði undirbúningsnefnd stjórnsýslubrotakærumálanefndar Ríkisendurskoðunar afskipti af yfirtöku Ad Karitum Perpeptum á vefléninu www.boggull.blogspot.com
Lögfræðingurinn Hafþór Blöndal, sonur hins nafnkunna jazzballettdansara og alþingismanns föður síns, tók við málinu og eitt af fyrstu verkum hans var að kanna lögskráningu fyrirtækisins.
Kennitöluna á bakvið kennitölu fyrirtækisins, reyndist eiga Gunnar Smári nokkur Lýðsson en sá er látinn - til lengri tíma reyndar - varð bráðkvaddur við slátur á býli sínu í Garðasveit árið 1897.
Hafþór, sérlega settur lögfræðingur s.s.b.k.m.n (stjórnsýslubrotakærumálanefndar), Blöndal reyndi þvínæst að hafa upp á þeim erindrekum fyrirtækisins sem hvorki eru skráðir eigendur né hluthafar en höfðu komið að máli við bogglateymið um yfirtökuna og einnig sent bréf til veflénsins blogspot.com og reynt að fá endurgreiðslu á útgjöldum tengdum heimasíðunni.
Hafþóri reyndist sú leitin erfiðlega því hvergi höfðu komið fram nein nöfn í þessum viðskiptum - hann þurfti því að reiða sig á minni starfsmanna bogguls inc og láta vinna andlitsmyndir eftir lýsingum vitna.
Var það langt verk og leiðinlegt bæði og erfitt, bæði vegna þess að settur teiknari embættisins er blindur og heyrnarlaus og líka vegna þess að teiknarinn verður að notast við náttúrulega skyggingu í verkum sínum - og getur því eingöngu unnið á suðvesturhorni landsins þegar sólin er í nónstað.
Síðan gerist fyrir algera tilviljun að að máli kemur hinn þekkti miðill Andrá Sigynardóttir, en hann (hún) á sæti í Menntamálanefnd Alþingis og hefur unnið að skipulagningu menntastefnu framtíðar ásamt hinum þekkta Tarot galdramanni Gunnari H. Birgissyni og eldgleypinum Francois Gilbert. Andrá faxar hugsanir sínar til Hafþórs og finnur hann í þeim samnefnu með því sem hann leitar.
Í hugsunum Andrár eru bæði nöfn og heimilisföng og getur Hafþór því loksins sett sig í samband við meinta yfirtakara bogguls inc.
Hann nær ekki sambandi við neinn þeirra en Andrá Sigynardóttir hafði séð það fyrir og var búin að faxa hugsanir sínar inní gagnagrunn fjársvikadeildar Lögreglunnar og þaðan fara upplýsingar loksins að berast.
Í ljós kemur að fjórir atvinnusvindlarar, sem hér verða ekki nefndir á nafn, hafa dottið niður á sömu hugmynd að sama gróðabrallinu án þess hvorki að þekkja né að vera í nokkru sambandi við hvor annan.
Um það orti ónafngreindur alþingismaður, eftirfarandi stöku:

Þótt ég hvorki kannist við
kát sú lífsins blíða
Fljótt af storki mannist mið
mát þú hnífsins fríða

Síðan hlutabréfamarkaðurinn var gerður alfrjálsur og þar var farið að sýsla með bæði veflén og stakar heimasíður, hefur hvorutveggja gengið kaupum og sölum. Sum netpláss eru verðmæt, önnur sérlega og enn önnur ekki. Um þessi viðskipti myndast oft milliliðar sem kaupa og áframleigja öðrum sem á þurfa að halda. T.d. gæti harðfiskkaupmaðurinn Ásþýr keypt vefstaðsetninguna www.adamant.is og síðan leigt samnefndum listamanni afnot af síðunni eða selt fyrir gróða.
Mun það hafa í hnotskurn verið hornsteinninn í gróðabralli þessara svindlara. Nema hvað þeir skipulögðu sig ekki saman og voru hver að vinna fyrir sig - því hafa komið 4 ólíkar pantanir um sölutilkynningar um sama vefsvæðið á hlutabréfauppboðið Upp- og endurlausn hf en enginn getað fullnað söluna því, og var það brotalömin í brallinu öllu, að það er ekki hægt að kaupa vefsvæðið www.boggull.blogspot.com því það er enginn eigandi að svæðinu.
Það hefur verið sett stopp á viðskipti athafnamannanna fjögurra og verða þeir handteknir og færðir fyrir dómara við fyrsta tækifæri.

Það lítur því allt útfyrir starfsemi bogguls muni færast aftur í upphaflegt form. Það eitt stendur óútskýrt hver tengsli Framsóknarflokksins eru við brall þetta alltsaman. Lengi hefur menn grunað framámenn í flokknum umað vilja kasta rýrð á nafnkunnan ritstjóra Fréttablaðsins og þykir ólíkindaleg tilviljun að samnefndur löngulátinn bóndi að norðan skyldi valinn til að skrást sem eigandi að Ad Karitum Perpteptum.
Málið er komið í Samsærismálanefnd og er niðurstaðna að vænta á næstu dögum. En þangað til, til hamingju með að fá boggulinn aftur.

kv. Sælir Leðurverkarar, fyrir hönd samsteypu um ævisagnaritun æviminningar Hafþórs Blöndals, lögfræðings undirbúningsnefndar stjórnsýslubrotakærumálanefndar Ríkisendurskoðunar

MIKLIR HLUTIR AÐ GERAST Á VEFSETRINU BOGGULL

Þau miklu tíðendi hafa orðið að Gegngá Auðunnardóttir ásamt gengi sínu af skríttnefndum vafasemdar vísindamönnum hefur verið rekin og fyrirtækið Boggull sem hún hefur rekið í nafni samnefnds forvera síns, Bogguls Boggulssonar, verið yfirtekið og fært á lokaðan hlutabréfamarkað. Rekstur fyrirtækisins hefur þótt vafasamur svo ekki sé meira sagt, ágóði vart merkjanlegur og niðurstöður rannsókna, ávallt í einprenti, nánast undantekningalaust endað í bogglakjafti.
Fyrirtækið Ad Karitum Perpeptum hefur því yfirtekið rannsóknarstöðina og breytt henni í ritstjórnarskrifstofu fyrir rannsóknarfjölmiðilinn Eilífur sannleikur sem hefur útgáfu á komandi sumri um það mitt.
Eilífur sannleikur mun beina sjónum sínum að því varpa hulunni af því sem starfsmenn fyrirtækisins kjósa að kalla "frumspekilega inngróna siðferðisspillingu í Íslenskum fjölmiðlum". Blaðamenn fjölmiðilsins munu allir skrifa undir dulnefni þarsem umfjöllunarefni þeirra verður af slíkum meiðistoga að þeim væri bráður bani búinn af borðlagðri nafnkennd.
Eilífur sannleikur verður borinn áskrifendum, útgefendum og kostnaðaraðiljum í hús að kostnaðarlausum og er hér með lýst eftir viljugum aðiljum tilað taka að sér allt þrennt.

Hafið augun opin fyrir fyrsta skúppi Eilífs sannleika: "Opinberun Gunnars Smára" sem segir frá ótrúlegu samsæri Fréttablaðsins, Framsóknarflokksins og Vátryggingafélags Íslands um að standa að samblæstri umað koma höggi á Guðjón A. formann Frjálslynda flokksins.

Einhverður Tvígerðisdóttir (Yfirlýstur framkvæmdastjóri fyrirtækisins - athugið nafnið er dulnefni)

og hér er annað lag. það kallast SOUND CANVASS eftir aðfærafræði Bogguls Boggulssonar, ÖRUGG YFIRFERÐ, sem er notuð við bakfærslu erfðasýna í ProQuest lyklun. sýni eru tekin úr 25 stiga heitu vatni og stungið með miklum hraði í 28 stiga heitt vatn. sýnið er síðan tekið úr 28 stiga heitu vatninu nokkru áðuren það hitastig hefur yfirunnið fyrra hitastig sýnisins og því næst er notað þar til gert tæki til að hrista hitastigin tvö saman svo úr verði nokkurskonar millistigs hitastig á sýninu sem síðan er rannsakað og sett í frumuskiljunarskönnun.
Gegngá Auðunnardóttir (mætt til vinnu á ný)

hér er lag sem boggull nr 3 gerði í soundscape designer. einsog heyra má hefur rannsóknarþjónustan orðið sér útum ýmis hljóðfæri svo bogglarnir geti unnið við kjör aðstæður. við höfum kosið að nefna þetta lag REGGEA THULEA í höfuðið á nagdýrum sem bjuggu bóllega á Íslandi áðuren norðanmenn settust þar að. Íslenskir raggar, einsog þeir eru nefndir uppá íslensku dóu út um 1111 og var vitað um síðasta raggann í Skötulsfirði í maí mánuði
Boggull Boggulsson (ekki hræðast, Boggull er ekki risinn uppfrá dauðum - það fannst gamalt minnisblað frá stofnanda okkar og ritstjórninni fannst vel að birta það)

nú fer þetta alveg að koma - okkar menn höfðu samband við sína menn innan raða Háskóla Íslands og þeir höfðu svo sitthvað samráð sínámilli og hverísínulagi, okkur skilst að þannig gangi hlutirnir fyrir sig. allavega finnst þeim sem þykjast hafa ástæðu tilað vita betur en við sem minna en verra vitum, framgangur þessi vera í áttina að von um bjartsýni.
meðan við bíðum er ekki úr vegi að rifja upp skemmtilega sögu af boggli nr 7 - sem er gulmósíður, þrístrengdur hálfkarlkyns boggull úr fyrsta klaki. svo var að Eidís Dísdísardóttir, framkvæmdastjóri stöðnunarsviðs, átti leið framhjá búri númer 14 - þarsem nótabene boggull nr 7 átti allsekkert að vera. bogglar raðast í búri eftir tölulegum kringumstæðum fæðingarferils síns og þarafleiðandi átti boggull nr 7 að vera í búri númer 8 - einsog gefur að skilja. en allavega, Eidís, sem sjaldnast skiptir sér af framkvæmdaferli starfs síns - var sumsé þarna stödd fyrir óútreiknanlega tilviljun (say no more, Guðjón, ég veit hvað þú ert að hugsa!), stendur þarna framifyrir búri númer 14 og sér að búrið er opið. skiptir þá engum togum að manneskjan, Eidís, sem veit hvorki hvað snýr fram og hvað snýr aftur á bogglum og væri vís tilað reynað fóðra pindsvín á hamstrafæði - tekur sig bara svo til og lokar búrinu. sem var ágætt per se, búrin eiga að vera lokuð ef bogglarnir eru ekki með stéttarleyfi eða í tilraunarfráskrift.en það vill svo illa til að boggull nr 7 lokast inní búri númer 14 þarsem hann á ekki að vera. þar var hann síðan í tvær vikur og enginn vissi hvar hann var. búr númer 8 stóð autt, og allir leituðu logandi ljósi að honum og fundu hann hvergi. engum datt í hug að spyrja Eidísi af þeim sökum einum og helstum að það var engin ástæða tilað ætla að hún hefði nokkra vitneskju um þetta tiltekna mál. síðan gerist það að farið er að leita að boggli númer 15 sem átti að vera inní búri nr 14 og hann finnst heldur ekki. í búri hans finnst aftur á móti boggull nr 7 og situr þar feitur og pattaralegur með mikið nægjuglott á vörum. var þá ekki frekar spurt af afdrifum bogguls nr 15.
Frekvari Stundaglas (skrifar í forfollum Gegngáar Auðunnardóttur sem liggur heima með snert af útlimaleysi)

jæja, núna eru að koma skriður á þetta. Háskóli Íslands hefur lýst sig reiðubúinn að hýsa rannsóknarverkefni okkar, tónlistartilraunir bogglanna, á þeim forsendum að allt sé þetta vísindum til framdráttar. annars erum við að velta fyrir okkur, þótt við megum augljóslega ekki segja það - tíufingur upp til goðs, og berja á borð og salt yfir öxl - að hugsanlega sé pólitík í spilinu. nýkjörinn forseti borgarstjórastóls, náfrændi fjögurra í rannsóknarteyminu og á-frændi (frændskapur fjær en nár en liggur í áum - ekki ám, notabene, heldur áum - forfeðurnir og mæðurnar voru hrossaþjófar og sýsluðu lítið með og við sauðfé), hefur umfram aðra borgarstjóra og hjáseta á nálægum borðum funda, sýnt vilja í verki og vangá að styðja við bakið á þeim lítilmögnum sem ekki fá minna en það sem lítið er í augum fárra. borgarforsetinn er mikill bæði á borði og sverði og náttúruunnandi inn mesti.
Þessvegna segjum við - og hvorki getum né viljum annað,: lifi náttúruveldið!
Gegngá Auðunnardóttir (skrifar fyrir hönd Kvælmis upplýsingarfulltrúa - en boggull nr 4 beit úr honum augun í síðustu viku og hann er frá starfi sínu af þeim sökum)

það hefur komið til tals að síðan (boggull) nýtist ekki nógu vel þarsem hún er á íslensku. liggur því beinast við að láta þýða hana yfirá spönsku. okkur í samstarfshópnum finnst hugmyndin góð en utan rammafjáráætlunar okkar sem stendur. við létum Price Waterhouse Cooper gera úttekt á því hvað það myndi kosta að fá laggiltan skjalaþýðenda til að snúa síðunni jafnharðan yfir á áðurnefnt tungumál og lögðum fram kostnaðaráætlun til handa fjárstyrkjanefnd rannsóknardeildar Háskólans. beiðninni var hafnað við fyrstu skoðun en við gefum ekki upp alla von. í millitíðinni væri ágætt ef netverjar gætu látið af hendi rakna svona einsog nokkrar og nokkrar krónur, jafnvel tugþúsundir slíkra.
framlög má senda á eftirfarandi heimilisfang:
Rannsóknarstofa í ótilgreindum rannsóknum
Vetrargarði
Háskóla Íslands/ Suðurgötu
101 Reykjavík

í öðrum fréttum er það helst að rúmur meirihluti rannsóknarbogglanna sýnir mikinn áhuga á skapandi skrifum. börn Bogguls reyndu í hefndarskyni að gefa bogglunum eitrað smartís en bogglarnir brugðust við með því að raða sælgætinu upp í orð og setningar og voru þeir hver um sig, búnir að skrifa heila skáldsögu, þegar vakthafandi rannsakari vitnaði tiltækið og lét vita.
ég hafði samband við Eddu miðlun og útgáfu, um samstarf og útgáfu á ritsmíðum bogglanna og hefur Páll Skúlason aðstoðarútgáfustjóri fullvissað mig um að eitthvað margmikillegt er handan við hornið í þeim efnum.
Kvælmir G. Klæmsson

afsakið eyðu síðustu daga. boggull boggulson lenti í agalegu slysi þegar hann gerði athugun á endurkastsumfangi eins rannsóknarboggulsins.
eftirlifandi meðlimir samstarfshópsins hafa aftur komið sér saman um það að láta þetta hræðilega slys ekki draga úr okkur (hópnum). eftir langan og stífan fund var tekin ákvörðun um að ég, undirritaður, Kvælmir G. Kvælmsson, muni taka að mér útihald þessarar rannsóknarniðurstaðnabirtingarsíðu sem svo óheppilega mun samt- og enguaðsíður halda nafni hins fráfallna frumkvöðuls, Bogguls Boggulssonar.

einn boggullinn hefur sýnt ótvíræða tónlistarhæfileika - í hádeginu í morgun var honum gefið kakó og leyfi tilað leika sér í tölvunni. þegar við komum til baka var hann búinn að semja lag í Fruity Loops-forriti. alveg merkilegt
við ætlum að fylgjast nánar með þessu og pósta tónlist bogglanna á netið eftir áföngum.